هحكى حكايه حلوة اوى كانت على القهوة بين راجل كبير وشاب يارب تعجبكم
كان ياما كان
فى جلسه .. "على القهوة" بين احد الشباب وراجل كبير فى السن..
عمو ..عمو.. اسالك سؤال محيرنى...
خير يابنى!!
ياعمو انا اتفرجت على فيلم عربى قديم اسمه شئ من الخوف ورجعت اتفرجت عليه تانى وبرضه فيه حاجه مش واضحه لى ..
اه فيلم "شئ من الخوف" دى قصه عظيمة وكان لها تاثير جامد اوى لما نزلت .. وحصل عليها كلام ايام الله يرحمه عبد الناصر..
ياعمو .. انا ماليش دعوة بايه الى حصل ايامها..انا كل الى عاوز افهمه واعرفه..هوة ليه كان جواز عتريس من فؤادة باطل.. الراجل اتجوزها على سنه الله ورسوله وابوها "مضى العقد" وطول الفيلم يقولولنا جواز عتريس من فؤاده باطل "طب باطل ليه"؟! محدش قال.
باطل "يابنى" علشان اتجوزها غصب عنها..
ياعمى دة مش موضوعى انا ماليش دعوة الجوازه كانت "غصب ولا بمزاجها" انا بسال هى مش تمت شرعى..وكان فيه مأذون وشهود..ليه "تبقى باطله" .
قلتلك لانها كانت "غصب" وده كان المعنى من الفيلم ..اى حاجه تتاخد غصب تبقى "باطل"
ياعمو هى "جاموسه" الراجل سرقها من اصحابها ولا محفظه علقها انا بتكلم على "جوازة" تمت بورق رسمى.
يابنى الجوازقبول وتراضى..وهذا شرط لم يتحقق "فى جواز عتريس وفؤادة".
لأ اتحقق ما البنت فؤاده ما اعترضتش وماسمعناهاش ساعة ماجه "عتريس"تعترض "بالعكس" بصت لابوها ومافتحتش بقها .
ايوة.. سكتت عشان خايفه على ابوها ومش عاوزاه "يتأذى".
خايفه عليه مش خايفه عليه دا موضوع يخصها انا الى يخصنى الجوازة تمت "صح" ولا لأ ليه بقى يتقال عليها باطل.
يابنى افهم..الجوازمش ورق..الجواز حاجات تانيه كتير قوى ..
بأقول لحضرتك "سؤالى محدد" الورق كان سليم ولا لأ ؟!
ايوة ياسيدى كان سليم بس دة مش المقصود.
شفت الورق سليم ..اديك اعترفت اهه..يبقى ليه بأه.. خوتونا طول الفيلم ان الجوازه باطله.
يابنى .. الموضوع مايتاخدش بالشكل دة.. دى كلها رموز .. يعنى الجوازة كانت رمز "لاغتصاب" الغير دون رضاه.
برضه مش شغلتى.. يرمز زى ماهوة عايز لكن يقول ان الجوازة باطله ليه؟!
بأقولك ايه باطله ولا مش باطله .. ملعون ابوك على ابو فؤاده على ابو اللى جاب عتريس فى يوم واحد غووووووووووور من قدامى.
ها ايه رايكم تحفه مش كدة كل واحد يقولى رايه وايه الى عجبه