بسكويت النوشادر

بسكويت النوشادر
(بسكويت العيد - بسكويت المفرمه ....)
المقادير
كيلو دقيق (6 كوب) -1 كوب سمن -ربع كوب زيت -2 كوب سكر بودرة - 5 بيضات - فانيليا -نصف كوب لبن (او ماء او عصير برتقال )-1 ملعقه طعام ممسوحه خميرة نوشادر (بيكربونات النوشادر )-بشر برتقاله
ملحوظه
بيكربونات النوشادر تتميز برائحه قويه ونفاذة جدا لذلك يجب حفظها فى برطمان محكم الغلق
فى بعض الاحيان قد تحتفظى بكميه منها فى مطبخك وعند استخدامها تجدى انها بدات تتحلل ويتكون تحتها سائل مائى
فى هذة الحاله ......لا تستخدميها ...ارميها فورا!

الطريقه
نخفق السمن و الزيت والسكر معا خفقا جيدا على درجه 3 فى المضرب الى ان يصبح الخليط هشا
نضيف البيض والفانيليا ونكمل الخفق
نذوب خميرة النوشادر فى اللبن (او الماء او عصير البرتقال (حسب الرغبه)
استعملى اى منهم حسب رغبتك فى قوام البسكويت (ناعم او مخرفش)
اللبن يعطى نعومه للعجينه -الماء يجعل البسكويت مخرفش -عصير البرتقال يعطى نكهه مميزة جدا للبسكويت ولون اصفر فاتح جميل
يراعى التاكد من ذوبان النوشادر تماما فى السائل قبل اضافتها الى العجين لان وجود تكتلات بها وعدم ذوبانها جيدا سيسبب الا تتوزع الخميرة جيدا فى العجينه وتكون فقاعات وثقوب كبيرة فى بعص القطع وقطع اخرى تكون مكتومه

نضيف اللبن او الماء او عصير البرتقال وبرش البرتقاله الى الخليط السابق ونكمل خفق لمدة دقيقه
نوقف الخفق
ننخل الدقيق جيدا مرتين ونبدا باضافه تلات ارباع كميه الدقيق الى خليط البسكويت ونبدا العجن باليد
العجن بيكون باطراف الاصابع فى حركه دائريه
نكمل العجن بنفس الطريقه مع اضافه الدقيق قليلا قليلا الى ان تتشكل معك عجينه متوسطه الليونه ولا تلتصق باليد
ملحوظه: قد لا تحتاجى لاضافه كل كميه الدقيق كلها (حسب نوعه)
التشكيل
نركب الموس المشرشر الخاص بتشكيل هذا البسكويت فى مكانه المخصص على المفرمه (ممكن على المفرمه اليدويه او الكهربائيه ....باعمله على المفرمه الكهرباء بيكون سهل جدا وسريع فى تشكيله واوفر فى المجهود)
مع ملاحظه تقليل جزء بسيط من مساحه الشرشرة اللى هاينزل منها العجينه بانك تسحبى الموس قليلا الى الخارج بحيث يتبقى ثلثين مساحه الشرشرة فقط حتى لا تكون قطع البسكويت عريضه جدا فى شكلها النهائى بعد خبزها لالن هذا البسكويت حجمه بيكبر كتير فى الخبز
ضعى العجينه فى المفرمه وابتدى شغليها
قطعى البسكويت باطوال مناسبه ...حوالى 8 سم بيكون طول مناسب جدا
مع مراعاه عدم سحب الوحدات او شدها من المفرمه حتى لا تتغير رسمتها او تتعوج (شكلها وحش)....سيبيها تخرج براحتها واستقبليها من المفرمه على ايدك بهدوء
رصى الوحدات فى صوانى الخبز المبطنه بورق الزبدة
اخبزيها فى فرن على حرارة حوالى 200 لو فرنك صغير
او 220 لو فرنك كبير
فى الرف الاوسط
الى ان تنضج وحدات البسكويت و تاخد لون اشقر جميل

يفضل حفظه فى علب صفيح

جربيه وقوليلى عملتى ايه